***
Ай чарии, иніп,
Ызых чарларны чалғаан…
Кимең чайхалып,
Кӱр адыҷаамны сахтаан…
О! Тадылығ суғ салғаа!
***
Систілче нан паа,
Ax чарых чылча кидер,
Ырах нан парып…
Хатабох тіріг тахта! —
Хан Тигір… чирнең хада!
***
Кӧгенеен тастап,
Кимең пазох чӱс пари…
Хурут кии холлап
Хайран тыным пат пари
Хыныс кӧлінде… Ползын!!!
***
Тораатха мӱнчем,
Ізіг чарларны холлап…
Хысхырызың ниик
Тоспас торааттың чориин
Апарча тирең… кӧлзер!
***
Ил чазы, идің
Хыраңнары пастыра,
Хуйу-холлары
Сырыптары ӧтіре
Тораат чӱгӱртче… хызыр.
***
Пілчем ме?.. Танда
Чалама чалтыразы
Ханнаң ма хатап,
«Чоннаң!» тіп пытыразып,
Пазох Ил Ханы тоолир…
***
Сағысха кірді
Ээмек тузында
Он ікі час изере
Тымылбин пір дее
Телефоннаң чоохтазып,
Ниме ни тілбіреебіс?..
