Чаа чоғыл, че… армия пар,
Субалысча тигiр ӧзеенҷе,
Хуттары чох тастар кӧзеенҷе…
Кӧрдек-ал, оларны хадар!
Пурнада парча пiлiгҷi,
Чалғызааннаң ыраххы тiлҷi…
Анаң соонаң оларға хозылып,
«Хакас»-таң адаластығ оғыл!
Парчаны оларның хыйғалар!
Кинделернi пазып чайааннар!
Че соонҷа оларның тӧллерi
Пiлбин тур пабалар кӧглеенiн!
Чаа чоғыл, че… армия пар:
Тадар тiлнең хоостап сӧлееннер,
Киптенiп, аймахты ӱтееннер —
Диссертацияларны пазар!..
Че соонҷа субалысча тӧл —
Тадарлап, хакастап ӧспеенi…
«Хынчам» тiп Ӧкернiң кӧрбеенi
Сыбырапчалар мағаа: «Ӧл!»
Сыбырапчалар мағаа: хайы
Тадар тiлiңнiң сiлии-пайы?
Сыбыхтапчалар — ӱгренмееннең,
Хырығ ӧлiм хыйча — кӱстенменнең!
Ол армия — пӱӱн хакас чоны!
Тӱгдередiп, пӱгӱрелдiрiп,
Пас парча арғаазынға чуунып…
Пас парча килкiм хойлар соонҷа.
Турчам мин… тағ пазынаң кӧрiп,
Сыбыхтасчалар олар нимее-де:
Кибелiмнiң таанмас ӧттерiн;
Кидерли, «люблю»-ланып ӧӧрнең
Ол армия… пари хайдар-да.
Чаа чоғыл, че… ӧлiмнiг тӧлiн
Кӱстенчем кибеллестiг ӧӧнең
Ал халарға чабыс «хайдар»-даң:
Ырах чоллығ — пӧзiк тирiглер:
Хан Тигiрнiң чариин ибiрлеп,
Сын Чанын тудар… тадар аазынаң!
Тадар тӧрiзе — Тадар Ханынаң!
Чаа чоғыл, че… армия пар,
Субалысча тигiр ӧзеенҷе,
Хуттары чох тастар кӧзеенҷе…
Кӧрдек-ал, оларны хадар!..
***
6 май 2021 чыл…
