Тіллер ӱгренер киреенде ноға-да мындағ пӧгін тудыбыстым: кӱннің сай пір чӱс наа сӧс ӱгрен кӧрерге итсе, ноо ниме полар ни зе? Хайдағ сағыс тиріглері кирек ни зе? Ноо оңдайға одырарға кирек пол парар ни зе?
Саннар санан кӧргенде, пір айға 3000 наа сӧс ӱгреніл парғадағ, че ол ниме чуртаста тиліҷең ниме полар ни зе? Чир ӱстуңде кем-де пу сурығны пӧккен полар ла тіп сағынчам, че мындағ киректі толдыразынаң пӱдірерде илееде пос тус кирек.
Амды ӱгреніс тӧстеглерін позыма чарлап кӧрерге сағынчам.
Пастағызы – 100 наа сӧс ӱгренері алынҷа піліс чоллахтарынҷа поларға кирек. Кӧзідімге алза, мин сайттар ит парчам. Мағаа веб-технологияларына саарылчатхан сӧстер изерізін ӱгренерге кирек. Оларның даа аймағы илееде. Сайт итчеткен чӧрінділерінеңер (движок) ле чоохтаза, Moodle паза WordPress теннері сағысха кире ойлапча. Аннаңар, англия тілінде олардаңар ӱгредігліг мануаллар сыбыра хығырарға кирек. Пу чоллахтаң кӱннің сай 25 сӧс пазып одырза, сағынчам, читкіҷе полар. Пу чоллах, тирбіс, профессия суриина кӧні теелче.
Ӏкінҷізі – мағаа тіллер ӱгренҷее чағын. Полған на тілдеңер грамматикаҷа ӧнетін пілігліг (научнай) терминнері таптал парған. Грамматика сурығлары хоостыра ӱгреділчеткен сӧстерін ідӧк мииске киріп одырарға кирек полар. Пу чоллахтаң ідӧк 25-че наа сӧс киптеп одырза, сағынчам, 50-ҷе сӧс саны мында толын пар турар.
Ӱзінҷізі – полған на кізі чуртас хоостыра ноо-да ниме итлеҷе. Мында даа иртеннең иирге читіре кізее теелілічеткен таңмалар ӱғаа кӧп. Усхунғаннаң, аарланып-чуунынғанынаң пасти, азыранғанын санға алып, тоғысха чӧргенінең хоостыра кізее сыбыра тоғасчатхан ниме-ноолар толдыра! Оларны даа сӧске алып, тілге киріп, хоза 25-че сӧс мынзынаң сыбыра толдырынарға чарир. Піди 75 сӧс санынға чидіп алдыбыс.
Тӧртінҷізі – кибелістер, сарыннар, чайаачыластар, политика, экономика, спорт ибіре хайнасчатхан сӧстер ідӧк илееде. Пу – хабарлас чоллахтарынаң палғалыстығ. Пірее хабарластығ сайтты кӧр сал турарға хайди даа кирек полар. Піди 100 сӧске чидініп алдыбыс.
Амды за…
Материалларны хайдаң аларға? Паза – сӧстерні чыып, нинҷе тус ӧнетін ӱгренҷеене хорадарға кирек полар? Кӱннің сай 100 сӧс ӱгренҷең устаныстарны кӧріп аларға кирек. Оларны таап, посха кӱндег пӧгіннерін тус хоостыра пӧліглеп саларға кирек полар.
Тӧрт чарыдыхти пӧлзе, полған на пӧлікке ортымахти пір час кирек пол парар, неке. Ӏди кӱнде ӧнетін тӧртер час хорадып одырза, пір айға… 3000 сӧс тирніп аларға чарир, неке.
Аннаңар мындағ пӧгіннер турыбысча:
Пастағызы – 100 сӧстіг ӱгредіг оңдайларын істезерге кирек.
Ӏкінҷізі – полған на сӧстер чоллахтарынҷа сайттар таап аларға кирек.
Ӱзінҷізі – америкадағы англия тілінең чоохтасчатхан орындағы кізіні таап аларға кирек полар.
Тӧртінҷізі – тіл ӱгренҷең тирігліг сайт ордызы минің пу блогым полар. Хоза оңдайлар – ютубтағы канал паза Miro теен ӱгредігліг платформа. Халғанҷызында сӧстерні хоостирға кирек полар! Анда полған на 100 кизектіг хоос сӧстер изерізі полыбызары – ӧӧн пӧгін. Анаң олох платформада, парыс киреен кӧдіріп, аны ахча чолынҷа тилідерге кирек полар.
Пизінҷізі – кӱннің сай салтарларымны кӧріп, арғаасха пастыр салбас ӱчӱн, пу блогта иртен сай пір час тоғын турарға килізер.
Андағ оңдайнаң, амды мин пастағы алтамны таптап алдым – позым позыма пӧгін турғызып алдым – англия тілінең кӱннің сай 100 наа сӧс ӱгрен сал турарға!
Паза: пу пасхан нимее пір часча хорадыл парды.
