Удаа мин хынчам кӱлеети 
Тызарға тынны анда - хайда-да,
Хайда пазымнығ чон тӱнеектеп
Сомнарын часча чазаңнап...

Хылчаңни ирткен тус чориин,
Сомнапчатча ноо-да хазыңда,
Алай талайның хайдағ-да хазынаң
Вконтакте тарапча... кӧзідии.

Чон чыылған чирде тахпахтар,
Арса, табызы саңналар арығ...
Постың блогында сарналған сарын
(Ползын ол саңай даа - чазығ)

Тын сарыпча пос тании салыхнаң:
Тадар табан ӧӧнін хазырча - 
Тадар тілнең пик пазығ чазылып,
Кибелімнең часхарча табысны:

Кӧрчебер? Сибдейек-соолған
Хылиинаң чалғыс тасхыл осхас:
Ах пазы ағарып тооза
Ам даа пічіктепче изін!
Тадарлап киптепче блогын!

Хысхы килді, хысхы килді! –
Хысхырынча… Хысхы?
Кӧзенексер пахлап кӧрзем –
Хайдадыр за… ах харыҷах!
“Хысхы килді, хысхы килді…” –
Хоҷаңнапча кӱндег!
Хысхы, тізең, ил позынаң,
Ам даа киптепче соохтарны,
Ам даа толғанча-поохталча,
Унағастарнаң чыынча…
Таңда, пірсі кӱн аалладып,
Хысхы сынап килгедег, таң!…
Мин дее кӧмес тимнен салим,
Кибеліске киртіп салим,
Сӧс халыхтарын оох –
Хысхы чит килзе соох,
Сынаптаң ол пораанназа,
Ағаа мин сӧстер тазынып,
Ӏзіг чӱреемні азынып,
Салам артых кибелімнең –
Хысхы килді! Хысхы килді!
***

Паин Саа

***
Маңзыра, син, маңзырирға.
Маңзыра, син, хынарға.
Маңзыра, ойлап, чуртирға,
Маңзыра сöс тударға.
Маңзыра кӱннiң айызын,
Маңзырап, кöр килерге.
Маңзыра чирнiң чалбағын,
Маңзырап, ибiрерге.
Маңзырап, маңзырастарда
Пiр ниме, син ундуба:
Пiрее хаӌан сағаа чуртаста,
Килiзер…маңнанмасха…

***

Сибдей Том

“Маңзыра, маңзыра, маңзыра!.. –
Маңзырат парча маң маңзыраах, –
“Маң маңзырын маңадап маңнадып,
Маңнар маңын маңнирға маңнан!” –
Маңзыраахтар маңнастарда мааңнап тур,
Маңсыраахтар маңнастарға маа чох,
Маңнығлары маңнағда маңнанып,
Маң чох маахтығларнаң мааңыспинча!
“Маңзыра, маңзыра, маңзыра!..” –
Маңзырат парча маң маңзыраах.
Маңзырааҷах маңнаныстар маңын
Мааннап таа алза, маңзыраахпас!

Хорей.

Пу – хорей. Пастап алаң мыннаң!
Слогтар саны сабызын кӧре
“Пір” саннаң “ӱсті” кӧр сал, “писті”,
Тын кӱзі “читее” тӱсче, анаң
“Тоғыс” сан изереде ӧсче,
Сағысха “он пірінҷі” читче…
Пот, піди хорей кибел пӱтче!
Табыснаң сӧс чорығын санап,
Тын кӱзін чӱреегіңнең палғап,
Хоос сӧстернің чазығын толғап,
Пазылча хорейдеңер кибел!
Че, амды син, хығырығҷы, піл:
Пу – хорей, хакастарда парох!
Сағылча кибелде хатабох!

***

Ямб

О, ямб! Илбек Баин роман пасхан аннаң!
Че піс, тізең, ӱгрен салар кирекпіс:
Тын табыстың тӱсчеенін кӧр кӧрербіс
Ноо слогтарнаң, хайзызы пар саннарнаң
Кибелістер чазал турча тын-ааснаң?
“Ӏкіні” син сал сал пурнада мииске,
Анаң “тӧртті” хостандыр сал хостидаң,
“Алтыны” даа изере таптап одыр,
Анаң за “сигісті”, “онны” хондыр тынға –
Мына піди, палғалча ямб кӧглері!
Че син, тізең, ӱгрен салдах ӱннерін!
Изере пар саннарны мииңде тыыт сал:
Ӏкідең-тӧрт, алтыдаң-сигіс, онынҷы,
Он ікінҷі, он тӧртінҷі, он алты…
***

Дактиль

Дактильнің чорығын мииске аларда,
Вальс осхас теелбекті пол кӧр саларға:
Саны кірлектенер ӱс пар алтамнаң,
Чолы чоллахтанар ӱс слог хатағлап! –

Ӱс слог хаталчатса тын кӱзі тоолир,
Тын кӱзі хабынар слогты пастағы,
Соонаң ол сегірер тӧртке кӱстеніп,
Тӧрт сан читінҷізі слогтаң кӧглелче,

Азыра кӧріп, он санын харахтап…
Дактиль чоллахтанча сарын чазағлап!
Пір паза тӧрт, читідең он санға…
Че, тадар чоным, ӱгрен ӱр чылға!
***

Амфибрахий

Пазох сан санирға ӱгретчем чонны! –
Кибелістер чорығын піл син амды!
Тын хабы изерізін систіп, сығар,
Ӧкпеңнең-чӱрееңнең ил чарых сарнаай!

Ӏкее ам тӧстене сан сарып сана,
Ӱс хадыллығ чорииң “писке” ам тарта,
Хал сигіс санға читкен тын кӱзін хаап,
Он пірінҷі слогты санирбыстар таап.

Паза соң саназа он тӧртке чидеең,
Че анзы поэтке халчатхай чиркеен…
Мына – амфибрахий, санап кӧрдек позың,
Хайдағ ни пар слогха тӱсче тын хостозы?

***

Анапест

Хапчығай! Хапчығай! Хапчығай! –
Маңзыратчыдар мині хоғдай…
Маңзыратча саннарны санап,
Салаа игірнең “ӱс” сан чазап!
Ӱс сан соонаң “алтаа” хондырча,
Алты аазынаң азып тын-кӱс
Хайхас тоғызын “тоғыста” сӱӱпче –
Хакас сӧзінде чорыхтар ӱӱлче!
Кӱлӱктердең піреезі пол парза,
Хоғдай сарынына хаптыр парза,
Кибел чорығында пар – анапест!
Пілер аны, кӧглир ам хыйға, пит!

***